Euliebollen, euliekouken zeggen we in t Veenkolonioals. Hou din ook, lèste dag van t joar heurt dat der bie zo as bier bie d’oktoberfeesten. En vanmörgen begon t geliek goud bie De Meet. Noadat t oapevolk heur bananen had haarn, kwam Jan K der mit n dainblad mit euliebollen aanlopen. En elk kon geliek aan de bak. Zon ding met rezienen der in, lekker man.

Prenger was wat aan de loate kaante en dij het nog aine had. Ruud nait, dij kon geliek aansloeten. Noar Onstwedde dizze keer, noar Meems. En via via, deur d’oetlopers van Westerwolle, noar Westerwolle en zo op t kerkdörp aan. Nait zunder slag of steut. t Was nait Jan L zien dag. Eerst op t brugje bie d Giezelbaarge keek hij de wereld vanoaf de grond aan en loater in n technisch stukje kroakde t nuver. “Baain broken,” wui der vroagd? Mor zien biezundere zoadel ston zowat vertikoal op zien fietse. En t gepruts mit schroevensleutels, imbuss – gevallen, t huilp niks. Jan kwam der nog mit in Onstwedde mor vanòf doar was t noar Veele. Johan L kreeg sleutels van t bussie, mor dij wol der eerst nog met op wintersport en zel nog wel onderwegens wezen.

In Onstwedde TG in t veurste geduilte en wie noar achtern. Mooi stee. En doar wui dugteg proat over t scheuveln, pieltjes smieten, t’inde van t joar, vuurwaark. Ook kwam de vrouw van t hoes nog even in gesprek met Andre B dij ze nog kon van vrouger. “Gain hoar meer,” zo begon t gesprek. Ruud was even oet beeld. Mor hij was even bie d beste sloager van t Noorden aan west, sloager Hemmen. En hij haar n grode puutte mit pinkieworsten. t Smuik meroakel mit appeltoarte en slagroom der bie.

Noa t òfrekenen was t nog even deur de bossen op weg trugge noar Bennewolle. Op noar old en nij. Mok der wat van in 2017.

Foto’s op Google Foto.

Geef een reactie