Van Proatjeboksem

Gustermörgen stond hai weer op t pergram, de Bolsjewiekentocht. Volgens mie ooit in t leven roupen deur twij echte rooie rakkers, Henk Edens en Anno Nap. Dus op tied richten Bennewolle.

t Was mooi weer, nait te veul wind en de temperatuur vol ook al tou. k Haar allain d’aarmstokjes der bie aan en dat was genog. Bienoa bie De Meet zai ik Bart en Gea al in de pitstroate stoan. Gea heur snelhaidsmeter dee t nait, dus geliek n monteur derbie en ik heb klokt, binnen 8 seconden ree ze weer. Was heur gain aine veurbie goan dus ze hail dezulfde plek.

Bie De Meet aankommen waren der al n poar jonges en wichter en dat laip oet noar n 40 man/vraauwlu. Toun elk der was op pad. Eef mit mie op kop en geliek de sokjes der in. Richten Schanze ging t en der wer mooi deurfietst. En  toch was der even tied om wat bie te proaten en wat van de natuur te zain. Zoas ain van onze leden zègd: “ ie mouten ook om joe tou kieken en van de natuur genieten en keuveln.” Nou dat hevve we doan der is in wezen allain mor mooie natuur in dizze kontraainen. Meroakels ging t en zo gingen we deur de polder op d’Hoamer en Sikkelloane òf. Dizze loane mout der aaltied even in want je waiten dat is t taiken van de rooie jonges. (en t Noordelekste weerstation van NL red)

Richten Beerte en zo noar t vlaigveld van Tom in Oostwold. Mooi over de nije ruilverkavelingsweg op Woldendörp en Nijwolle Oost aan. En doar gebeurde t – en dat krieg je as je de natuur mor zain willen -. Momferd stak over, zwart briltje op en stok in zien pootje. Even veur de wat jongere minsen, Momferd  is n molle en speulde vrouger in de Fabeltjeskraante. t Ging net goud mor Peter ree hom zowat over zien steert. Intussen Wirtjo al mor even bèld davve  zo tegen tien uur bie hom waarn. De kovvie en gebak was weer goud veurmekoar en we konden mooi in de zunne zitten. Wie waren aan de vrouge kaante of de andere jonges en wichter waren wat verloaterd, loater bleek n lekke baand haar heur bie de neuze had en n malheur in de route. Mor wie gingen weer op pad toun zai der aan kwamen.

t Ging over Woagenbörgen, Schoapbulten en zo op Delfziel en Termunten aan. En t bleef meroakels goan tot aan de Finnewolmer toren bin de sokjes dij der s mörgens vot aan goan waren nait weer oet west. Elk is zien aigen weg goan toun we Finnewold oetreden. Jonges waren goud te spreken hou of t goan was guster dus wat wil je nog meer. Dus denk der om, blief om joe tou kieken en blief van de natuur genieten.

Foto’s op Google Foto.

t BMW

Geef een reactie