Duils van Eeljo, duils van Jopie

Veur de twijde keer ging t op de Slegge aan. Dij toerkommizzie van ons  het der volgens mie aandailen in, want t is bienoa aal weeke noar de Smeerling of de Slegge. Dus toun d’hoane ainmoal kraaid haar, was t oet de veren want ik sloot in Bennewolle aan.  k Haar d’ogen nog mor net open toun vloog de teezjeevee van Oostwold al de polders in. Dat was mie nait geven, want ik mos d’aandere kaante op. In Sodom ston der ain man en ain peerdekop en dij kroop gauw bie mie in t rad. Even veurbie Blijham waarn wie al drije. Aankommen bie De Meet was der nog gain kip te bekennen en binnen wie mor gaauw in de schaare zitten goan. Bie leutjen aan wer de koppel aal dikker en stonden der vattien man/vraauwluu.(dij ook as kirrels rieden, dus is der waineg verschil).

Doar kwamen de staarke verhoalen al lös, der was zelfs aine dij haar drij lekke banden had, terwiel hij mor op twij velgen rid. Doar was zulfs aine dij de bidons haar vergeten, mor dat werd as gesmeerde bl……even regeld deur onze verlopen kastelaain. Oetaindelek gingen wie op pad en was t bie de eerste òfslag al mis. Dij t regeln mos haar d’ogen nog boven op de kop mor noa n aantal slingers haarn wie de roete weer te pakken. Over Veele en de Smeerling ging t op Harpel aan. Noa Jipsingboertange bin k òfzwaaid en bin k over Kopstokken weer op hoes aan goan. (mien laive vraauw was joareg west en kreeg t hoes vol mit klaainkinder)haalverwege kwam de teezjeevee oet Scheemde mie tegen, k haar amper gelegenhaid om goiedag te zeggen, toun was t al weer ain zwaarte stippe.

Zo as je lezen kinnen is Eeljo òfdraaid onderwegens mor wie hadden òfsproken dat ik t verder vertellen zol.  Hai haar n mooie verontschuldigen mit t verhoal dat zien laaive vraauw joareg west het mor ik kin hom al wat langer en de reden van zien weeromdraaien haar naargens anders mit te mokken as dat hai flaauw is van Westerwolle. Hai het t allain mor over dat alles boven d’A7 goud is. Non ik kin hom dit vertellen, der is mor ain boven d’A7 en dat is Westerwolle. Zo dat is der oet. Noa dat hai ons verlotten haar ging t in gestrekte draf  wieder noar de Slegge, woar w’altied welkom binnen en de kovvie mit gebak nog veur veuroorlogse priezen binnen. Der was nait veul bedrievegheid bie t wotter dus ook gain dikke vizzen te zain. Lekker waarm op terras nuigt joe hoast tot in sloap vallen mor dat wordt wel in de kiem smoort deur aal dat gekoakel.

Noa de koffie weer op pad  en wie waren nog mor n klaain ìndje op pad dou we der achter kwamen dat we twije kwiet waarn. Eerst ains kieken wel dat den wel waarn. Bleek agteròf dat Johan Swarts n lekke baand had haar en Dick is bie hom bleven. Waorom dat der gain aine was dij doar wat van maarkt het is n wonder. Bie d wegrieden van de Slegge was t al gebeurd. Haarm Jan Oolders bedogt zug nait en ging weer terugge terwiel wie op Beetseweg stoan bleven te wachten. t Duurde den ook nait laang of ze kwamen der mit heur drijen weer aan.

Bie d weer opstappen heb k nog wel even tegen de groep zegd dat ze goud links en rechts kieken mozzen of ze Eeljo ook zagen want hai is hier totoal nait bekend en verdwaoalt meschain in t Sellingerbos. En den gait hom dat straks net as dat Japans jongkje ,binnen we hom doagen achterain kwiet. Mor t ging goud, hai is haile overkommen. Net as in de hinraaize zat de gang der goud in en t was mor n karwits en dou waarn we weer thoes. Mooie raaize deur Westerwolle, lekker waarm in Westerwolle en n  mooie 14 man/vraauw in Westerwolle , Wat wil Westerwolle nog meer.

Geef een reactie