Dou ik van berre oafkwam was t wel n beetje duuster mor t was dreug ,en de berigten leken wel goud en dus mor aantrekken en op pad. Kom ik bie De Meet waarn der al n poar en noa n zetje waarn we zes man en ain vrouw. En dou begon d’ellinde. Jan Koerts stak zien kop boeten de luifel van t gebouw woar hai zo laank de scepter zwaaid het en geliek begon t te regen. En nait zon klain beetje. Mit bakken vol vuil t oet de lucht en doar stoa je den mit joen goud gedrag. Wat non. Mor wie hebben der n poar bie dij binnen nait veur ain gat te vangen en dij trokken de telefoons veur n dag en even op Buienradar kieken. En den krieg je t. d’Aine zee t is zo dröge en d’aander zee duurt nog wel n half uur en meschain wel langer .

Den is t mor goud dat wie Karel hebben, dij beslist den op zien kaalme toon wat der gait gebeurn. Ik zel zùlf wel even boeten kieken, zegt Karel en mits kloarde t al n beetje op. Mor intussen was t al dik negen uur en t wer tied om vot te goan aanders huifde t nait meer. Mor woar goan we non noar tou? Noa wat wikken en wegen besloten we om mor noar Smeerling te goan veur de koffie, as t den nog regent kinnen we rad weer noar hoes.

Dou ging telefoon van mie oaf. Eeljo aan d’aander kaante. Hai zol mit auto noar de Weddemountains rieden en den aansloeten op Ozzediek. Hai zegt: “Joop ik goa weer noar hoes want as ik hier tot auto oet stap stroom ik in ainmoal zo de Westerwoldse OA in en dat heb k laiver nait want ik kin nait zwemmen. Dat hebben wie boven d’A7 nooit leert want der het ons nooit aine verteld dat wie hier zoveul woater kregen. Ik wens joe t beste.” Den pazen wie non op stee de raize aan en zo mit n draaie hier en draaie doar noar Smeerling.

Ik zee jongens ik mout Dick bellen want dij wol rechtstreeks noar de Slegge. Ik heb hom nait te pakken kregen en heb hom beld dou we weer bie hoes waarn. Hai was wel in Troapelkanoal west en sommegen dij kinnen rustig achter train liggen goan dij gebeurt niks. Hai is oet Scheemde vertrokken en het gain druppe regen zain.

Dou wie vanoet de Gasterij van Margriet boeten kwamen was t net of we op n’aander planeet stonden. t Mooiste weer van Haikamp. Zunne scheen en t wer recht n beetje waarm. Dou hevve oafsproken dat we n beetje deur en om Vlagtwedde rieden zollen en dat hebben we doan. Ale padjes dij we mor vinden konden binnen we ook over west. Den links om de bogte en den weer rechts om de bogte, wie werden der doezeleg van.

Te laange lesten reden we inains in Alteveer. Doar hebben wie Jakob oafzet en wie wollen doarnnoa Fokke weer noar Veele brengen mor dou wie weer op de Holtebaarge waarn bedogt hai zuch inains en ging d’aander kaante op. Bie de bult omhoog. Wie binnen nog wel even deurfietst noar Veele en dou zachjes aan noar Bennewolle.

t Leste stuk bie d knoal langs zegt Corrie: “Loat mie mor even op kop. Dat hebben Jabn Koerts en de schriever waaiten. Tegen de wind in aal zon 33 á 34 op de teller. Ik dogt eerst dat mien tellertje stukkend was mor dij van Jan gaf dat ook aan. Man wat kin dij fietsen. In n poep en zucht waarn wie  bie hoes mit tonge op de daarde knoopsgat.

Datteg kilometer in regen en bienoa 40 km in zunne. t Kin roar lopen.

Geef een reactie