k Heb ze vanmörgen eerst mor even wurgen loaten, d’eerste pankouken binnen tog altied veur de kinder en ik bin op d’Òlleweg aansloten. Eerst deur de rooiste dörp van t laand en toun in Beert is t aigenlieks  nait veul aans  en dat over de Wiegersweg. Ondertussen vloog mie de Teezjeevee van het mooiste loug van t Oldambt mie veurbie en noa twijmoal mit de ogen knippern was dat n stipke aan d’horizon. Noa twij körten, twij langen kwamen ze tog mit dattien man, o joa der waarn ook nog vraauwluu bie, teveurschien. Toun was t op noar Nij Beerte en doar heb k mie de ogen oetkeken. Huile bult laaive  vraauwluu dij aan ons wuiven en roupen deden, Ik kon der gain aine van mor goa eerdoags es even vroagen wat ze nou aigenlieks van mie wollen.

Toun wast op Schanze aan en noa de strepe was t klinkertjes rieden. Wol Jopie ons ook nog wies mokken dat hai nog veul slimmer mit mokt haar bie Paries-Roubaix. Deur t mooie Rheiderlaand. Veurjoar is ja de mooiste tied van t joar, noar Òl Rheen bie Gerard.

Doar was nummer vieftien al aankommen en was de kovvietoavel al dekt. Jopie haar de boudel dit moal veur honderd persent regeld en dat mag ook wel s n keer zègd worden. De kovviekannen kwamen op de toavel mit n lekker stok gebak, ik dogt dat dit ter ere van onze kameroad dij joareg west was, mor toun wie weer vertrokken mos de buule wel trokken worden.

Ainmoal weer over d bròkje wer de ploug bie d Rederveld aal klaainer, Tienus en Marieke knepen der tussen oet en op de òfdraai noar Veelerveen ging Fokke der vandeur. Bie de Mercedesbrogge luit Annekw zok even doalen, mor loater bleek t gemeleer der nog overal op te zitten, allenneg zel Harry wel even strieken motten. Op Veele kneep onze steun en touverloat Jopie in de remmen en ging binendeurop hoes aan. Bie de Wedderweg gingen de goien op Pekel aan en de rest noar Wedderveer. Bie d Emergobos zat Koarel ook nog bie ons mor wie gingen op Sodom aan en k heb Gert-Jan bienoa bie de veurdeure òflevertd. \

Toun wast nog ain stief ketaaiertje en toun haar k hom ook te pakken. Ik snaar nait voak as wie dizze kaante opgoan mor vandoage was meroakel veur mekoar en der was gain aine dij wat te mekkeren haar. Dus hevve weer n plazaairege en goud besteedde zotterdagmörgen had en hoop k dat der nog veul van dizze doagen volgen maggen.

 

Geef een reactie