Mien OLDAMBT – van Eeljo

Ik bin in Grunnen geboren
Hier in t’ OLDAMBT op klaai
k Heb hier mien haarte verloren
Hier tussen de baiten en praai

Oldambt…..Oldambt…..
t’Vrugtboarste laand van hail Nederlaand
t’Oldambster volk waarkt haand in haand
Toer ‘80 fietst het best op t’Oldamster klaailaand

Vrouger was t aans volgens onze voader
Toun was t vòlk hier nait zo blied
Vair körtbaienen in ain bedstee
Joa …..zo ging der meer in dij tied

Vrouger…..vrouger…..
Proat mie tog nait meer over dij òl tied
Kiek nou mor noar veuren en goa haand in haand
Mit Toer ‘80 soamen deur t’Oldambster klaailaand

Boetenlanders kommen voak aanwaaien
Hier in t’Oldambt op onze mooie klaai
Goan den mit heur geld zwaaien
Hier tussen de baiten en praaien

Oldambt…..Oldambt…..
t’Vrugtboarste laand van hail Nederlaand
t’Oldambster volk waarkt haand in haand
Toer ‘80 fietst t bèst op t’Oldambster klaailaand

Vrij vertoald deur ònze Toer ‘80 dichter

Kiek as je dit achter de koezen hebben den schaai der mor mit oet. Goie verstoander het mor ain half woord neudeg en as k t redden kin, den sloek ik ook nog n poar woorden in. Wat veur de Belgen ronde van Vloandern betaikent, dat is veur ons zon dag as vandoage. t Huil Oldambt ston op de kop want onze toerkomizzie haar eindelek weer zien verstand terogge kregen en haar de raaize over Temunten legd.

Zat aans vanmörgen nait mit, om kwart veur zeuven luip de wekker òf mor toun was mien allerlaifste al in de bainen, bleek dat ze lebait was, beroerd en de boudel op  t leutje. Plan was dat ik op de fietse noar Bennewolle kwam mor in dit geval heb ik mie nog ain keer omdraaid. k Heb mor even aangeven dat k aansloot onder de Scheemder toren, Jopie zee dat zai doar om haalf tiene bie Viétor om de bogte kwamen mor k heb der soamen mit nog n pazzipant bienoa drij ketaaierr stoan. t Is de Jopie nait meer van vrouger, de sleet zit der bie hom ook op en der was n flinke poeste wind tegen.

Ain geluk, noar n poar honderd meter ging t over de bult en waren wie over de A zeuven. t Weer sloug om en t was goud fietsen mit Kluuter. Haalverwege kreeg Jakob wind aan de boetenkaante op Pastorieloane, dus mos der repereerd worden. t Was mor goud dat er nog aine was dij der n beetje varstand van haar anders haarn wie der nou nog stoan. Dij aandern stonden n beetje met de handen bie de kl….. of wat der veur deurgoan mot en mie luiten ze t waark doun. In n poep en n scheet zaten wie weer op de fietse. Allennneg, dij röt pompe van Koarel was aigenlieks riep om in de waale van de sloot te gooien. Noa  t hoogholtje in Nijscheemde en deur  t Woar werd de boudel nog n keer stil zet, wie kregen mie doar n fikse Meertse buie over ons hin.

Noa de Hondsholstermeer binnen wie van de route òfweken en over de Zummerdiek op Zieldaip aangoan. k Haar t zùlf in de kop mor deur gekwedel van dij noast mie ree, muik ik n klaain slippertje, dus wer t keren en draaien om de goie route weer te pakken. (twas meschain twinteg, datteg meter terogge en n keboal dat ze mie doarover haarn) Toun ging mien mobieltje en mos k der wel even òf ( tiendoezend euro loat je nait zo mor even lopen) mor der waarn enkeln bie dij direkt aanzeten deden, k heb vief / zes kilometer in de agtervolgen eeten en den pas bliekt wat joen allerbeste kammeroaden binnen(nou heb k nait zoveul kammeroaden) dij bleef tenminste wagten en kon k oet de wind weer aansloeten.

De kovvie mit wat lekkers vloog der goud in bie Landman en toun was t de zeilen op want ging gloeiend veur de wind op t mooiste loug van t’Oldambt aan. Bie hoes aankommen bin k der mor ofgoan toun konden ze de weg wel weer terogge vinden.

Tot nou tou was dit verreweg de mooiste route dij wie mit Toer ‘80 mokt hebben en ik goa der veur om dat de volgende weke weer te doun. Aale mokkers bedankt veur dizze schone dag en dat er nog veul meer volgen maggen.

This Post Has One Comment

  1. karel

    Hè Eeljo,proat mie nait over die Oldamster klaai ik heb die rommel nog aan de fiets hang. ik blief aan`t baun.Moar ik mot tau geem t`was weer een mooie tocht en ik heb weer genot`n boom de A-zeum.

Geef een reactie