k Wis nait wak zag op de Wedderweg in Òl Pekel, vroagen ie joe meschain of wak doar te zuiken haar? k Was over n sloeproute doar beland om bie de Slakkengroep aan te sloeten, want wie gingen op Berend Botje aan, dij nooit weerom kwam. Nou hèt Zuudloarn nooit zon beste noam had, mor sinds der n òl lid van ons der woont en doar ook nog mit de gummiknuppel zwaait, is t toch wel wat verbeterd. Wie binnen mor nait bie hom langs goan mit zon dikke koppel, den waarn wie zeker bie hom op de kovvie kommen. (Hij rit mörgen de 165 km Giro tocht in Apeldoorn red…….)
Der was oardeg verstaarken vanoet d’aandere groepen, Gingen laiver nait noar t Hogelaand en dat was soms wel te maarken. Der binnen der bie dij zok mor amper inhoalen kinnen mor mit wat roupen en bulken huilen wie de koppel bie mekoar.

Achter Pekel langs, over Zuudwenden noar Wildervank en dat op Zuudloarderveen aan. k Heb t waiten, haar Jopie der veurege weke al n zooitje van (zon zes kilometer deur t zaand baggern) dit keer was mie de moaginhoald der bienoa deroet vlogen, meer den tien kilometer over dij röt klinkers, Parijs-Roubaix was der niks bie. Toun k bie hoes was haar k der bienoa gain schroeve meer in mien Stek zien Trek zitten. Oeteindelek kregen wie Prins Bernardhoeve in t verzier of dat wat der van over was en was t mor even en wie waarn bie d Sprookjeshof.

Man, man wat haarn de spiekerbeulen doar te kere goan, mor t zag der pieko bello oet. En de kovvie vol der best in. Noa de kovvie hevve dijgene dij wie der nait groag bie hebben wollen veuroet stuurd en toun der bie ons ook nog over meer kilometers sproken wer heb k mor veursteld dat ze mie noar hoes breng konden en dak ook s n keer in de watten legd wer. Wat bleek, tot mien verboazing, zai waarn der ook nog veur.

Mit de wind in de rogge en n schier groepke was t veur mie knietjesdoagen. Bie Emergobos was t net of der gain aine mit Jopie mit wol (soms binnen je hom ook laiver kwiet din riek) mor oeteindelek gingen de Pekelders mit hom mit. Via Scheemde hevve eerst Dick bie de veudeure òfleverd en binnen wie over Scheemdermeer en Laange Zuudwenden op t mooiste loug van t huil Oldambt aangoan en toun wie weer over de A Zeuven waarn, ging veur ons de Hemel open. Wat hevve t leste indje nog genoten. Vlak veur Oostwold sluig de noodlot tou, aine bleef mit veurrad in de geute zitten en ging onderste boven. Zoas t leek nait teveul schoade aan de fietse mor wel hier en doar t gemeleer der òf. Bloud kwam mit stroaltjes oet de knije mor den is t goud dat je n poar handege wichter bie joe hebben, dij hebben hom laifderiek verzörgd,

Aal mit aal n mooie dag en nou toch eindelek n beetje schier weer. Hier taiken wie aal weke veur.

Geef een reactie