Van Ina de Roo

De Toergroep ging zotterdag alweer slim vroug op pad, kwart over zes vanoet Bennewolle…gaap. Ik zat noa n week nachtdainst wel vot weer in t goie ritme, mor bliede wer ik der nait van.

k Haar nog t veurstel of t nait n uurtje loater kon mor Joop is onverbiddelijk….hai het, dat bleek tiedens de koffie, ook makkelk proaten, moar doarover loater meer…

Mit vief vraauwlu en zeuven mannen in de auto’s op weg noar Coevorden veur de Wilsumerbergtoer…Dij baargen vuilen n beetje tegen, aan t inde hadden we 278 hoogtemeters volgens Strava, dus dat schoot nait echt op. Beetje vaals plat wel en dat ken ook venienig in de kuten bieten.

Vanoet Coevorden al vlot noar Duutsland, woart t stroom nog boven de grond hangt en ze van asfalteren ook nog nait overal heurd hebben. Man, man , man wat n klinkers hebben we had. En hierbie wel flinke hoogteverschillen heur…de vullingen rammelden joe tot de koezen oet. Mor n prachtige omgeving en as we even per ongeluk van t pad òf waren , was der wel weer n boer dij ons op t rechte pad huilp.

Noa de eerste helft in Duutsland gingen we veur de koffie in òld Ootmarsum, ik denk dat de route moakers nait van Duutse slagroom hoalden.

Mooie pauzeplek, mit appelgebak of arretjeskeek, t vuil der goud in! Sommegen gingen ook in de pauze deur mit bewegen, kwam ducht mie van alle wepen dij ook wel zin in gebak hadden.

Tiedens de pauze wer ook dudelijk woarom onze plouglaider in goie doun is, hai het zich versieren loaten, wie hadden dat nait docht van hom, mor zai har hom goud inpakt! Doarom is hai nou in topvorm!

Noa de pauze rap weer Duutsland in woar Dick nog n poar klinkers vonden haar…

Ha ha, ik heb der wel over moppert, aal dat gehobbel, mor aal mit aal was t weer goud regeld en hebben we n haile mooie dag had. Mooi tochtje van bienoa 90 kilometer in een prachtige omgeving. Wat mie betreft was dat t vrouge opstoan wel weer weerd.

Jammer dat t seizoen alweer op zien end lopt, ik hoop dat ook de Toergroep op de ATB wieder goat en zo de conditie n beetje biehoald.

Geef een reactie