JB ED groep_jpg

Wat een mooie middag worden zol, is dus ook een mooie middag worden. Verzoamelen bie ‘De Meet’ was oafproat en zo gebeurde t dus ook. Ik zulf was mit Willem L. op de fietse noar Bennewolle goan en zo kwamen wie as ain van de eersten aan. Mor langzoamaan kwamen der aal meer jonges en wichter aan. Erik Dekker was der al en wat ook weer bliekt, een dood gewone jong dij mit elk wel even een mondje vol proaten wol. Wat dat aan gait net as Jan gain sterkapsones en hai vol dus vot goud in de ploug.

Noadat wie eerst even een stichtelijk woord had haarn van Bart, woarin hai elk en aine welkom haite, wer Jan even oet legt wat of der te gebeuren ston. Hai was der noamelijk vast van overtuugd dat hai om vair uur weer in zien luxe – woagen zitten zol omdat hai den nog een oafsproak haar. Nee dus, hai haar de middag vol en zien vrouw en kinder plus zien oalders kwamen ook bie ‘De Meet.’ Toun wer der roupen dat de fotogroaf kloar ston. Dus elk en aine noar boeten. En dat was een grote koppel met de jongens van Omega der ook bie. En joa heur, Stef de fotogroaf,  hai ston boven op een gammel trapke te jongleren, ‘t was net stoppie stopvaarfe, dit was vrouger de schilder bie ons in ’t loug. Mor de alpino oaf, hai kreeg het veurmekoar om een poar foto’s te moaken woar elk en aine opstaid. Toun werden de fietsen pakt en mos het wezen, eerst deur Bennewolle, zo richting Sodom, Midwolle en toun om de poule woater, wat ze het Oldambtmeer neumen.

Dit ging maist aal tegen de windt en der wer hier en doar toch wel even kreunt. Mor toun wie bie de zandbakke kwamen bie Midwolle kregen we het veur de wind. Zo deur Oostwold en zo noar Finnewolle, Beerte, alwoar de tandwielen al even slepen werden want het ging omt bordje Ulsde. Man wat wer der nog even weer te kere goan. Wel of hom pakt het wait ik nait veur honderd procent zeker mor volgens de berichten Joop Kuuper. Hai lag plat op de scooter en lachde elk en aine oet. Ook Jan en Erik deden mit mor kwamen noatuurlijk nait in de priezen.

In Ulsde even op de rest wachten en wat hier gebeurt; der brekt  n pony oet dij bie de mensen dij doar woonden in de veur toene laip. Mit man en peerd wer prebaiert om hom weer in de bloumtoene te kriegen, wat noa veul hin en weer lukte. Eef wol nog even de veurdeure open doun mor het dit toch mor nait doan omdat dit daaier zien poten nait vegen wol.

Zo weer richting ‘De Meet,’ alwoar wie ons even hemmelen konden en t feest nog even deur ging. Aale mensen dij der waren werden nog eem een keer welkom haiten. Ook Henk en Anneke Edens waren van de partij en dat dee een beule jonges goud. Bart maik as een echte verslaggever een interview  mit Jan en Erik ook waren der verschaidene foto’s van Jan te zain. Ook konden der vroagen steld worden en kregen de jonges een tasse mit van ain van de sponsors. Toun dit achter de rogge was wer Jan het cadeau aan boden deur onze veurzitter. Dit was een foto op zeefdrók en Francien haar hier even wat moois van moakt. Jan haar ook nog een presentje. De club kreeg zien leste shirt dij hai aan had haar in zien lestre wedstried. Hai haar der opschreven dat hai ons bedankte veur aal dai joaren support. Mooi man.

JB kado_jpg

Het toneel wer veranderd, ‘t eten was kloar. Echte Hollandse köst mit zuurkool, mous en stampot worrels mit een stok Gelderse of metworst. En dat mout zegt, het vol der even lekker in. Jan kreeg der bienoa gain eten van, hai dee eerst nog even n proatje mit een verslaggever van Wielerrevue, Tom Rustebiel. Bart het Jan den ook mor eerst wat opschept want aans was hai ons nog van de groad goan. Nog even bieproaten en wat drinken en zo wer wat een mooie zotterdag worden zol een mooie zotterdag.

Jonges ik doachde dat wie as verainiging ons van de goie kaante zain loaten hebben. ‘t Was aalemoal goud regeld, de opkomst goud en het eten dik veur mekoar. Ik hoop dat as Jan Boven weer es een keer in de buurt is hai weer even aanwaaien komt.
‘tBMW

JB en henk

Geef een reactie